د ترکیې خبرداری؛ ناټو کې به د فنلنډ او سویډن د غړیتوب مخه ونیسو
د ترکیې ولسمشر رجب طیب اردوغان یو ځل بیا ناټو کې د فنلنډ او سویډن له غړیتوب سره مخالفت ښودلی دی.
ښاغلي اردوغان ویلي چې دا هېوادونه دې د قناعت ورکولو لپاره پلاوي نه ورلېږي.
انقره له دې کبله له فنلنډ او سویډن ناراضه ده چې ګواکې د ترکیې او سوريې د کرد ملېشو غړو ته یې ځای او پناه ورکړې.
دغو هېوادونو تازه رسمآ اعلان کړی چې غواړي ناټو کې غړیتوب واخلي.
سویډن پر اوکرایین د روسیې یرغل ته په اشاره ویلي اروپا له نوي حقیقي خطر سره مخامخ ده.
د روسیې ولسمشر ولادېمیر پوتین وایي ناټو کې د فنلنډ او سویډن غړیتوب نیغ په نیغه مسکو ته ګواښ نه پېښوي، خو پر دې یې هم ټینګار کړی چې د پوځي زېربناو پراختیا به د کرملېن له غبرګون سره مخ شي.
د ترکیې ولسمشر رجب طیب اروغان د دوشنبې ناوخته یوه خبري کنفرانس ته وویل هېواد یې ناټو کې د فنلنډ او سویډن د غړیتوب مخالف دی.
هغه ویلي "له دغو دواړو یو هېواد هم د ترهګرو سازمانونو په تړاو روڼ او څرګند چلن نه لري. څنګه پرې باور کولی شو؟".
انقره دا دوه نوردیک هېوادونه کردانو کارګر ګوند "پي کې کې" او د سوري کردانو د "وای پي جي" سازمان غړو ته د پناه په ورکولو تورنوي.
د ترکیې حکومت همدا راز وایي دغو هېوادونو د فتح الله ګولېن پلویانو ته هم ځای ورکړی چې د انقرې په وینا دغه هېواد کې د ۲۰۱۶ کال ناکامه پوځي کودتا کې لاس لري.
دغو هېوادونو په ۲۰۱۹ کال تر هغې وروسته پر ترکیې د وسلو بندیز اعلان کړ چې سوریه کې یې نېغ په نیغه پوځي مداخله وکړه.
د فنلنډ بهرنیو چارو وزیر پېکا هاوییستو د دوشنبې پر ورځ هېلسینکي کې خپل پارلمان ته خبرو کې وویل د ترکیې دریځ حیران کړی.
خو هغه زیاته کړې چې د دوی حکومت د ده په خبره ښاغلي اردوغان سره "چنو وهلو" ته لېوالتیا نه لري.
ناټو کې د فنلنډ او سویډن له غړیتوب سره د ترکیې مخالفت داسې مهال دی چې د نړۍ دغه تر ټولو ځواکمن پوځي اېتلاف تازه بالتیک سیمه کې د پراخو پوځي تمرینونو د پيل اعلان کړی.
دغه تمرینونه اسټونیا کې کېږي او د فنلنډ او سویډڼ په ګډون د ۱۰ هېوادونو ۱۵۰۰۰ سرتېري پکې برخه لري.
