د امریکا منځمهاله ټاکنو کې د رایو او ملاتړ جلبولو لپاره د بایډن او ټرمپ وروستۍ هڅې رواني دي.
امریکا کې د نومبر پر ۸ مه د پلان شویو منځمهاله ټاکنو د ورځې په رانږدې کېدو سره ټاکنیزو مبارزې او منډې ترړې لا تودې سوې دي.
نن دوشنبه د دغو ټاکنیزو منډو ترړو وروستۍ ورځ ده.
د امریکا ولسمشر جو بایډن او مخکینی ولسمشر ډونلډ ټرمپ بېلابېلو ایالتونو کې په انتخاباتي غونډو کې ګډون سره هڅه کوي چې د خپلو ګوندونو نوماندانو ته لا ډېر ملاتړ جلب کړي.
ولسمشر بایډن په دې لړ کې له پنسیلوانیا را وروسته نیویارک او ډونلډ ټرمپ فلوریډا ایالت کې د خپلو ګوندونو د نوماندانو ټاکنیزو غونډو کې برخه اخیستې ده.
د امریکا منځمهاله ټاکنو ته یوازې یوه ورځ پاتې ده او نظر پوښتنې ښيي چې جمهوریپال یو څه برلاسه دي.
د ترسره شویو نظر پوښتنو د پایلې له مخې، جمهوریپال به استازو جرګه کې له دیموکراتانو اکثریت ترلاسه کړي، خو د سنا یا مشرانو جرګې برخلیک لا مشخص نه دی.
که جمهوریپال د کانګرس د یوې خونې کنټرول هم ترلاسه کړي، نو د بایډن حکومت ته به قوانینو کې د پلان شویو تعدیلاتو راوستل ستونزمن سي.
دیموکراتان په دغو ټاکنو کې ان په هغو سیمو کې هم د میدان بایللو ته چمتووالی کوي چې معمولا ټاکنې پکې د دوی په ګټه وي.
جو بایډن نیویارک کې د والۍ 'کټې هوکل' په ملاتړ جوړه شوې غونډه کې ګډون او وینا وکړه.
هغه د ډونلډ ټرمپ له ملاتړه برخمن 'لي زېلدین' سره سیالي کوي.
دا سیالي سخته ده او د همدې لپاره د امریکا مرستیالې ولسمشرې کماله هارېس، پخواني ولسمشر بېل کلنټن او د هغه مېرمن هېلري کلنټن هم اغلې هوکل سره ملاتړ اعلان کړی.
ښاغلي بایډن دلته وویل چې د سې شنبې ورځې ټاکنې به د امریکا راتلونکې مشخصه کړي.
ډونلډ ټرمپ بیا میامي ښار کې په جوړه شوې غونډه کې پر دیموکراتانو توندې نیوکې وکړې او دوی یې تورن کړل چې ګوندې امریکا یې د "کمونیزم" پر لور روانه کړې.
هغه وویل "دیموکراتان غواړي چې امریکا پر کمونیستې کیوبا او سوسیالیستې ونزویلا بدله کړي."
د امریکا د سنا جرګې برخلیک د جورجیا، پنسیلوانیا او نواډا په څېر د مهم ایالتونو د ټاکنو پایلو پورې تړلی دی. که هر ګوند دغو ایالتونو کې ټاکنې ګټي، نو د سنا کنټرول به هم ترلاسه کوي.
سکون راډیو
