زابل کې د ترافيکې پېښې له امله دېرش کسان ټپيان سوي دي !
په زابل کې یوې ترافیکي پېښې د ښځو او ماشومانو په ګډون لږ تر لږه دېرش تنه ټپیان کړي دي.
د زابل د عامې روغتیا مشر ډاکټر عبدالحکیم حکیمي وایي، پیښه د ورا د یوې مازدا ډوله موټر او ټېلر د ټکر له کبله سوې ده.
نوموړی وايي: "د کاکړانو په سیمه کې د یوې مازدا ډوله موټر چې د واده خلک یې انتقالول او ټېلر ترمنځ سخت ټکر وشو، له امله یې شاوخوا دېرش تنه هېوادوال ژوبل شول، د ځینو حالت د اندیښنې وړ دی."
ښاغلی حکیمي وایي، ټپیان تر لومړنیو خدماتو وروسته د کلات مرکزي روغتون کې بستر سوي او یو شمېر یې وینې ته اړتیا لري.
که څه هم د دغې ترافیکي پېښې لامل لا روښانه نهدی، خو د خوښیو پر مهال دا ډول خونړۍ پېښې تر ډېره د موټر چلوونکو د بې احتیاطۍ له کبله رامنځته کېږي.
سکــــون راډیو
