د پاکستان کراچۍ کې چاودنه؛ د مړو شمېر ۱۷ ته ورسېد
د پاکستان په لوی بندري ښار کراچۍ کې د پرونۍ شپې د چاودنې له امله د مړو شمېر اولسو ته پورته سو.
چاودنه د فاضل آب یا د چټلو اوبو په یوه سرپټي کانال کې د ګازو د راټولیدو له امله سوې.
لومړی د وژل شوېو کسانو شمېر ۱۲ اعلان سوی و.
د کراچۍ د پولیسو یوه مشر سرفراز نواز شیخ ویلي، د سختو ټپيانو له ډلې ځینو بېګا په روغتون کې ساه ورکړې ده چې ورسره د مړو شمېر لوړ سو.
هغه وویل، ۱۶ کسان ټپیان هم دي.
په کراچۍ کې د چټلو اوبو ګڼ کانالونه سرپټي دي او د چارواکو په خبره ناقانونه ودانۍ پرې جوړې دي.
پرونۍ چاودنه کې هم د حبیب بانک ودانۍ چې په همدې سرپټي کانال جوړه وه ړنګه سوې ده.
