افغانستان بانک په بهرنیو لېږدونو کې اسانتیاوې رامنځته کړي
د افغانستان بانک وايي د سوداګرو او پانګوالو په بهرنیو لېږدونو کې یې ځینې اسانتیاوې رامنځته کړي دي.
دغه بانک وايي، له دې سره به په افغانستان کې د خوراکي او غیرخوراکي توکو بیې هم ټیټې شي.
د افغانستان بانک ویاند صابر مومند په هغه صوتي پیغام کې چې نن یې ازادۍ راډیو ته رالېږلی ویلي، له دې سره به د سوداګرو او پانګوالو ګڼې ستونزې حل شي.
خلک شکایت لري که څه هم د امریکایي ډالرو په وړاندې د افغانیو ارزښت یو څه لوړ شوی، خو د ضروري موادو بیې لا هم ټیټې شوې نه دي.
