د فېسبوک شرکت څښتن د ۱۰ زره کارکوونکو دندې ختموي
میټا شرکت چې د فېسبوک، انسټاګرام او وټس اپ ملکیت لري، د ۱۰ زره کارکوونکو دندې ختموي.
د یادونې ده، چې یاد شرکت پروسږ کال نومبر کې هم د نژدې ۱۱ زره کارکووکو دندې ختمې کړې وې او اوس دویم ځل د دومره ګڼ شمېر کارکوونکو دندې پای ته رسوي.
د میټا شرکت اجرايي مشر مارک زوکیربیرګ وايي، د دندو ختمولو دا چاره چې د یوه کال ''ګټور فعالیت '' برخه ده، ''سخته چاره '' ده.
نوموړي د خپل شرکت کارکوونکو ته ویلي، د لس زره کارکوونکو د دندې پای ته رسولو تر څنګ به په شرکت کې پر شته پنځه سوه دندو نوي کسان نه ګومارل کېږي.
د نوموړي په وینا ۲۰۲۲ کال د شرکت لپاره د ''ویښتابه زنګ '' مانا درلوده، چې په عاید کې یې پاموړ کموالی ولید.
که څه هم د ۲۰۲۲ کال په اوږدو کې دې شرکت ۲۳ میلیادره ډالره ګټه کړې، خو چارواکو یې مخکې ویلي و، چې د همدې کال تر دسمبر پورې یې کال پر کال عاید څلور سلنه کم سوی دی.
ښاغلي زوکیربیرګ په امریکا کې د سود لوړې کچې، نړیواله سیاسي بې ثباتي او د ځینو مقرراتو یادونه وکړه، چې له کبله پر شرکت اغېز شوی او چارې یې سوکه سوې دي.
نوموړی وايي: ''زه فکر کوم موږ باید د دې نوي اقتصادي واقعیت لپاره چمتو واوسو، چې ښايي تر کلونو پورې دوام وکړي. ''
میټا شرکت په داسې حال کې د زرګونو دندو ختمولو اعلان کوي چې د ګوګل او امازون په ګډون شرکتونه د لګښتونه کمولو لپاره هلې، ځلې کوي چې په بازار کې سیالي وکولای سي.
سکون راډیو
