ملابرادر په دوبۍ کې د یو شمېر لوژیستیکي شرکتونو مشرانو سره لیدلي
د ا ا ا د رییس الوزرا لومړي مرستیال او د اقتصادي کمېسیون مشر ملا عبدالغني برادر په دوبۍ کې د یو شمېر لوژیستیکي شرکتونو مشرانو سره لیدلي.
د لومړي معاونیت په ټوېټر پاڼه لیکل سوي، چې برادر په دوبۍ کې د "څو ملیتي لوژیستکي کمپنۍ" له مشر محمد المعلم سره په لیدنه کې د سوداګرۍ په برخه کې د زیاتو اسانتیاو غوښتنه کړه.
د "څو ملیتي لوژیستیکي کمپنۍ" مسوولینو د ا.ا.ا پلاوي ته د هر ډول همکارۍ ډاډ ورکړی او دواړو خواو په دې هوکړه کړې چې د پاتې کارنو د پرمختګ لپاره یوه کمېټه جوړه سي.
د سوې هوکړې له مخې، هغه افغان سوداګر چې د دوبۍ له لارې نورو هېوادونو ته صادارات او واردات کوي د "څو ملیتي لوژیستیکي کمپنۍ" لخوا به ورته په لوژیستیکي برخو کې اسانتیاوې رامنځته کېږي.
دا په داسې حال کې ده، چې افغان سوداګرو په افغانستان کې د سیاسي بدلون وروسته نړیوال مارکېټ ته د لاسرسي په برخه کې له جدي ستونزو سره مخ دي.
