هلمند کې سباوون خصوصي تلویزیون له نژدې ۲ کلن ځنډ وروسته بیا ځلي په فعالیت پیل وکړ.
هلمند کې سباوون خصوصي تلویزیون له نژدې ۲ کلن ځنډ وروسته بیا ځلي په فعالیت پیل وکړ.
هلمند کې داسي مهال یو خصوصی ټلویزیون په فعالیت پیل کوي چي پر افغانستان د ا.ا له بیا واکمنیدو را وروسته ډیرۍ رسنۍ د مالي او اقتصادي ستونزو له کبله تړل سوي دي او ځینو یې آن خپل نشرات را کم کړي دي.
سباوون تلویزیون په هلمند ولایت کې د خصوصي رسنیو له مینځه یواځینۍ پخوانۍ رسنیزه شبکه ده چې په یاد ولایت کې یې د تیرو دوه لسیزو را په دېخوا رسنیز فعالیتونه ترسره کړي او د هلمندي ولس ږغ او ستونزو ته پر وخت انعکاس ورکړی دی. د دغه تلویزیون مسؤلین وایي؛ دوی به د نشراتو په بیا ځلي پیلیدو سره په ورځني ډول شپږ ساعته نشرات چې اسلامي، سیاسي، خبري او ټولنیزي خپرونې به یې برخه وي، هلمند میشتو ته وړاندي کوي او په خبره یې؛ د تیر دوه کلن ځنډ لاملونه تخنیکي ستونزي، اقتصادي مشکلات او په لښکرګاه ښار کې مخکنۍ جګړې وبللې چې په وینا يې د دوی تلویزیون یې تخریب کړي وو.
ورته مهال د هلمند د اطلاعات او فرهنګ ریاست مسؤلینو هم د یاد تلویزیون په بیا فعاله کیدو خوښي وښودل، هغه د رسنیو پر ارزښت خبري وکړې او رسنۍ یې د ولس او دولت ترمنځ د اړیکو یوه وسیله وبلله. د نوموړي له قوله کومي رسنۍ چې دا مهال په هلمند کې تړل سوي او که وغواړئ چې بیا خپل فعالیت ته ادامه ورکړي، د هلمند د اطلاعات او فرهنګ ریاست یې پوره همکاري او هرکلی کوي.
د هلمند سیمه ایز خبریالان او د رسنیو استازي هم د یاد تلویزیون په بیا فعالیدو خوښ دي او دا یې په محلي کچه یو ښه خبر وباله، دوی له حکومتي مسؤلینو او د رسنیو د ملاتړ له ملي او بین المللي بنسټونو څخه وغوښتل چې د رسنیو او خبریالانو سره وخت پر وخت همکاري وکړي او ورڅخه ملاتړ وکړي.
هلمند کې سباوون ټلویزیون داسي مهال خپل نشرات پیلوي چې تر دمګړۍ لا په دغه ولایت کې دوې تصویري او څلور ږغیږي رسنۍ د اقتصادي ستونزو له کبله تړل سوي او شاوخوا ۹۰ تنه کارکوونکي او خبریالان یې پر خپلو کورونو د بیکارۍ شپې او ورځي سبا کوي.
محمد نسیم شاکر
سکون راډیو
