په فرانسې کې یو زده کوونکي خپله ښوونکې په چاقو ووژله
د فرانسې د جنوب لویدیځ په یو ښوونځي کې د چهارشنبې په ورځ فبروري ۲۲ (کب ۳) یوه ښوونکې د خپل یو زده کوونکي د چاقو په برید کې ووژل سوه.
پېښه د سینټ ډیلوژ تفریحي ساحلي ښارګوټي په یو خصوصي ښوونځي کې سوې ده.
څارنوالانو وویل چې دې ښوونکې په صنف کې د فرانسوي ژبې درس ورکاه چې یوه زده کوونکي ورباندې د چاقو ګوزار وکړ.
له دې ښوونکې سره، چې عمر یې د ۵۰ کالونو په شاوخوا کې ښودل سوی، د پیښې په ځای کې عاجله طبي مرسته وسوه، خو د څارنوالانو په خبره، هغې د خپلو زخمونو په وجه ساه ورکړه.
له پېښې وروسته یو ۱۶ کلن زده کوونکی د برید په تور نیول سوی دی.
د فرانسې د ښوونې او روزنې وزیر پاپ ندیایي د ښوونکې په مړینې اندېښنه ښودلې او ویلي یې دي چې د پېښې ځای ته سفر کوي.
د پېښې دقیق علت لا معلوم نه دی.
سکون راډیو
