اروپايي اتحادیه: طالبانو سره اړیکه د دې ډلې د رسمیت پېژندلو معنی نه لري
اروپايي اتحادیه وايي، له طالبانو سره تماس د دې ډلې د رسمیت پېژندلو معنی نه لري.
د دې اتحادیې ویانده نبیلې مسرالي د دوشنبې په ورځ (د عقرب ۳مه) وویل، د بشري مرستو د دوام او له افغانستانه د اروپایانو او له خطر سره مخامخ افغانانو ایستل له طالبانو سره د تماسونو دلیل دی.
نوموړې زیاتوي: "د افغانستان په اړه لکه څرنګه چې پوهېږئ، پخوا مو هم په ځلونو ویلي چې موږ غواړو چې دغه هېواد کې لږ حضور ولرو. په امنیتي دلایلو جزییات درسره نه شو شریکولی. نو موږ په ځلونو ویلي چې دا د رسمیت پېژندلو نښه نه ده. غواړو چې له هغو افغانانو سره همکار واوسو چې زموږ مرستې ته اړتیا لري. نو په کار ده چې له طالبانو سره په تماس کې واوسو او د اروپایانو او له خطر سره مخامخ افغانانو د خوندي ایستلو لار هواره کړو او همدا راز ډاډه شو چې افغانانو ته بشري مرستې رسېږي."
