د هند د پوهنتونو افغان محصلان له انلاين ازموينو ورکولو منع سوي
د هندي رسنیو د راپورونو له مخې هغه افغان محصلان چې د هند په پوهنتونونو کې زدهکړې کوي او هند ته د ویزې د نه ورکولو د ستونزې له امله په افغانستان کې بند دي، په خپلو پوهنتونونو کې له انلاین ازموینو هم منع سوي دي.
د انډین ایکسپرس ورځپاڼې د راپور له مخې د دغو محصلانو یو شمېر مشرانو هڅې پیل کړي چې د هند او په افغانستان کې د ا.ا.ا سره دغه ستونزه هواره کړي.
د راپور له مخې دغو محصلانو ته چې ډېری یې انلاین زدهکړې مخ ته وړي، ویل سوي چې د ازموینو لپاره باید په پوهنتون کې فزیکي حضور ولري.
یو شمېر محصلانو دې ورځپاڼې ته ویلي چې که د هند حکومت ويزې ورکړي، غواړي هند ته لاړ سي او په ازموینو کې برخه واخلي.
ورځپاڼې په هند کې د افغانستان د سفارت د سرچینو له قوله ویلي، ستونزه د هند له لوري ده ځکه د هند حکومت په اوس وخت کې هیچا ته د ویزې ورکولو پالیسي نهلري.
په دې اړه کره شمېرې نه سته چې د هند د پوهنتونونو څومره افغان محصلان به په افغانستان کې بند پاتې وي، خو په تېر حکومت کې په زرګونو محصلان د بورسونو له لارې هند ته استول سوي وو.
