هلمند کې د پولیسو له ښوونیز او روزنیز مرکز څخه ۴۳۸ تنه سرتېري فارغ سول.
نن سه شنبه د هلمند ولایت مرکز لښکرګاه کې د پولیسو له ښوونیز او روزنیز مرکز څخه ۴۳۸ تنه سرتېري له نظامي زده کړو فارغ سول.
له نظامي زدکړو څخه د فارغ سویو سرتېرو په غونډه کې د هلمند والي او په کندهار کې د عمري قطعې قوماندان، د هلمند ولایت امنیه قوماندان ، داطلاعاتو او کلتور رئیس، علماء کرامو، د اکاډمۍ مسؤولینو، استادانو او د یادو سرتیرو د کورنیو غړو او دوستانو ګډون درلود..
د اکاډمۍ استاد شېخ مولوي عمادالدین حماس ګډونوالو ته د ښه راغلاست تر څنګ وویل: د خوښۍ ځای دی چي نن ۴۳۸ تنه سرتیري چي په اسلامي اصولو سمبال دي خپل نظامي زده کړي پای ته رسوي او ټولني ته د خدمت په موخه وړاندي کیږي.
نوموړي وویل موږ بشپړ ډاډه یو چي دا فارغه سوي سرتیري به ولس ته نه ستړی کېدونکي خدمت کوي او د دې اولس په خدمت کي به هیڅکله ستړي نه سي او دوی به د اسلام اوچت ساتلو لپاره بشپړ کار کوي.
د هلمند والي تازه فارغ سویو سرتېرو ته خپل خبرو کې وویل خپل ذهن مو د وطن پر ابادۍ جوړ کړئ، د ولس سره نېک چلند وکړئ او خپل دنده مو په پوره ایماندارۍ سره ترسره کړئ.
امنیه قومندان حاجي مبارک مولوی وویل؛ موږ له تاسو ډیري هیلي لرو چي د دې زورېدلي ولس خدمت به کوئ او د دې ښوونیز مرکز له استادانو مننه چي په پوره ایماندارۍ او اخلاص سره یې نوي سرتیرو ته ښه روزنه ورکړې.
نوموړي فارغ سویو سرتېرو ته وویل د خلګو څخه هیڅکله شخصي غوښتني مه کوئ او هغوئ ته اذیت مه ورکوئ.
د غونډي په ورستیو کې فارغ سویو سرتیرو ته شهادتنامې او ښوونیز مرکز مسؤولینو ته ستاینلیکونه ورکړل سوه.
یاد سرتیري ۱۹۴ تنه دنیمروز ولایت او ۲۴۴ د هلمند ولایت اوسېدونکي دي چي د شپږ اونیزو مسلکي زدکړو وروسته د فراغت سندونه تر لاسه کړه.
د یادوني وړ ده چي د هلمند ښوونیز او روزنیز مرکز د ا.ا را په دې خوا ۱۳۰۵ کسان روزلي چي نن یې څلورمه دوره هم پای ته ورسېده.
ســـکون راډیـو
