ملا محمد حسن اخوند د چارشنبې په ورځ د پروان بګرام کې د امریکايي ځواکونو د وتلو یو کال پوره کېدو په مناسبت جوړې شوې غونډې ته وویل، نړیوال باید ستونزې جوړې نه کړي:
"هر څه چې د دوی له انده ستونزې دي باید د خبرو له لارې حل شي، نه دا چې د ستونزو جوړولو لپاره پلمې جوړې کړي". ده وویل، چې ا ا ا له نړیوالو سره خبرو ته چمتو دي.
د بګرام هوايي ډګر کې جوړو شویو دغو مراسمو ته د ا ا ا لومړي وزیر دا هم وویل چې له امریکايي ځواکونو دوی ته له خاورد ډکو جالونو پرته هېڅ کوم بنسټیز کار نه دی پاتې شوی.
ده پر افغانانو غږ وکړ چې پر بهرنیانو دې خپل ځانونه نه تړي، بلکې خپل هېواد دې پخپلو لاسونو جوړ کړي
ملا محمد حسن اخوند زیاته کړه، چې اوس افغانستان کې امنیت راغلی، وژنې پای ته رسېدلې دي، او "اوس به هغه څوک تخريب کوي چې له لاسه یې عیش او عشرت وتلی وي، دوی موږ ته کوم داسې څه پرېښودل چې دا ملت پرې هوسا شوی وي".
ا ا ا له افغانستانه د امریکايي ځواکونو وتلو لومړۍ کلیزه تېره شپه پلازمېنه کابل کې په اور لوبو ونمانځله.
د خواله رسنیو ګڼو کارنو لیکلي چې دغو اور لوبو سره د کابل له بېلابېلو برخو د خوښۍ سختې هوايي ډزې هم ملې وې.
ا ا ا د وږي یا سنبلې نهمه د "ازادۍ ورځ" نومولې او د کار او ټولنیزو چارو وزارت یې ویلي چې له همدې کبله به نن چارشنبه عمومي رخصت وي.
ا ا ا همدا راز له افغانستانه د امریکايي ځواکونو د وتلو په تړاو یوه اعلامیه هم خپره کړې چې پر نړیوالو پکې غږ شوی چې د دوی په وینا د "افغانستان پر وړاندې معقول سیاست خپل کړي."
